Le tout au pluriel Magazine Magazine socio-culturel
Lèt ouvè pou :
Mesye minis Alix Didier Fils-Aimé.
Mesye Alix Didier Fils-Aimé,
Ou sanble ak yon pipirit k ap rele san rezon. Ou sanble ak yon zonbi Mèt Bawon Samdi ta abandone. Ou tankou yon tòchon fin sèvi anba chodyè madigra, yon pantalon ki pa menm gen fòm ankò, yon vye ranyon sal pèsonn pa ta vle sèvi avè l.
Sispann pran pòz w ap travay pou pèp la, paske anpil moun pa wè rezilta ki montre sa. Sispann pran sitwayen yo pou moun ki pa ka reflechi. Pèp la bouke ak gwo diskou ak pwomès ki pa janm tounen reyalite.
Peyi a ap fè fas ak gwo pwoblèm: ensekirite, grangou, chomaj ak yon mank konfyans nan enstitisyon yo. Nan yon sitiyasyon konsa, sa pèp la bezwen se aksyon konkrè, desizyon ki pote rezilta, ak transparans, olye de deklarasyon ki pa chanje lavi moun.
Fonksyon yon responsab leta se sèvi enterè popilasyon an. Se poutèt sa anpil sitwayen ap tann plis angajman, plis efikasite ak plis repons sou kestyon ki konsène avni peyi a.
Pèp ayisyen an merite plis pase bèl pawòl. Li merite rezilta.
Journaliste : Previlon Franckel
